ມອບປຶ້ມ ແລະ ເອກະສານສຳຄັນຕ່າງໆ ໃຫ້ຫໍສະໝຸດກອງທັບ
ວັນທີ 10 ຕຸລາ 2023 ນີ້, ສະຫາຍ ພົນຕີ ວໍລະສານ ວິລັດດາວົງ ກຳມະການຄະນະປະຈຳພັກກະຊວງປ້ອງກັນປະເທດ, ຮອງຫົວໜ້າ
ກົມໃຫຍ່ການເມືອງກອງທັບ ໄດ້ນຳເອົາປຶ້ມ ແລະ ເອກະສານສຳຄັນຕ່າງໆ ເຊິ່ງເປັນຊັບສິນສ່ວນຕົວທີ່ມີຄວາມສຳຄັນ ໄປມອບໃຫ້ຫໍສະໝຸດ
ກອງທັບຈຳນວນ 139 ຫົວ, ໂດຍການກ່າວຮັບຂອງສະຫາຍ ພັນເອກ ວຽງທອງ ວິດພາວົງ ຫົວໜ້າອຳນວຍການຫໍສະໝຸດກອງທັບ, ມີຄະນະ
ພັກ-ຄະນະບັນຊາກົມໂຄສະນາອົບຮົມ, ຫ້ອງການກົມໃຫຍ່, ຫ້ອງການເມືອງ, ບັນດາກອງສື່ມວນຊົນທີ່ຂຶ້ນກັບກົມໃຫຍ່ການເມືອງກອງທັບ
ແລະ ພະນັກງານ-ນັກຮົບພາຍໃນຫໍສະໝຸດກອງທັບເຂົ້າຮ່ວມເປັນສັກຂີພະຍານ.
ສະຫາຍ ພົນຕີ ວໍລະສານ ວິລັດດາວົງ ໄດ້ກ່າວວ່າ: ການມອບປຶ້ມ ແລະ ເອກະສານສຳຄັນຕ່າງໆ ໃນຄັ້ງນີ້, ເປັນການປະກອບສ່ວນອັນສຳ
ຄັນເຂົ້າໃນການພັດທະນາຫໍສະໝຸດກອງທັບ ເພື່ອສ້າງເປັນຄັງສາງເກັບກຳຄວາມຮູ້, ບັນດານິຕິກຳ, ບົດກະວີນິພົນ, ມູນເຊື້ອປະຫວັດສາດ ແລະ
ບັນດາເນື້ອໃນເຫດການສຳຄັນຕ່າງໆ ໄວ້ໃຫ້ລູກຫຼານຄົນຮຸ່ນໃໝ່ໄດ້ອ່ານ, ໄດ້ຮຽນຮູ້ນຳເອົາຂໍ້ມູນຕ່າງໆ ມາພັດທະນາຕົນເອງ ແລະ ກົມກອງ.
ພ້ອມທັງ ເນັ້ນໜັກໃຫ້ຄະນະພັກ-ຄະນະອຳນວຍການ ແລະ ພະນັກງານຫໍສະໝຸດກອງທັບ ຈົ່ງພ້ອມກັນເອົາໃຈໃສ່ປົກປັກຮັກສາ, ປັບປຸງ
ກົມກອງ, ສືບຕໍ່ກໍ່ສ້າງພະນັກງານ, ວິຊາການ ໃນການຍົກລະດັບຄວາມຮູ້ ຄວາມສາມາດ ໃນການຄຸ້ມຄອງຫໍສະໝຸດໃນກອງທັບ ໃຫ້ມີຄວາມ
ເປັນລະບຽບຮຽບຮ້ອຍ, ສະອາດຈົບງາມ ສາມາດດຶງດູດໃຈຜູ້ທີ່ເຂົ້າມາຊົມໃຊ້, ມີຄວາມສາມັກຄີເປັນປຶກແຜ່ນແໜ້ນໜາ, ຮັກແພງຊ່ວຍເຫຼືອ
ເຊິ່ງກັນ ແລະ ກັນ ພ້ອມກັນພັດທະນາກົມກອງໃຫ້ກາຍເປັນໜ່ວຍພັກປອດໃສ ເຂັ້ມແຂງ ແລະ ໜັກແໜ້ນ.
ແຫຼ່ງຂ່າວໂດຍ ຂກທ
ວັນທີ 12/10/2023